ސިލްކްރޫޓްގެ ދަށުން "ބެލްޓް އެންޑް ރޯޑް" މީޑިއާ ކޯޕަރޭޝަން ޔޫނިއަންގެ ނަމުގައި ބްރޯޑްކާސްޓިންގ ޔޫނިއަނެއް އުފައްދަވައިފިއެވެ.
ޗައިނާ ސަރުކާރުން ފަށާފައިވާ ވަން ބެލްޓް ވަން ރޯޑް އިނިޝިއޭޓީވްގެ ދަށުން މީޑިއާގެ ދާއިރާއިންނާއި ޘަޤާފީ ރޮނގުން ގުޅުން ބަދަހިކުރުމުގެ މަޤްޞަދުގައި އުފައްދާ "ބެލްޓް އެންޑް ރޯޑް މީޑިއާ ކޯޕަރޭޝަން ޔޫނިއަން" ގައި ދިވެހިރާއްޖޭގެ ފަރާތުން ބައިވެރިވެފައިވަނީ ޕަބްލިކް ސާވިސް މީޑީއާއިންނެވެ. ޗައިނާގެ ވެރިރަށް ބެއިޖިންގްގައި މިއަދު އޮތް މި ޔޫނިއަން އިފްތިތާޙު ކުރުމުގެ ބައްދަލުވުމުގައި ޕަބްލިކް ސާވިސް މީޑިއާގެ ފަރާތުން ބައިވެރިވީ ޗެއަރމަން އިބްރާހިމް އުމަރު މަނިކު އަދި މެނޭޖިންގް ޑިރެކްޓަރ އިބްރާހިމް ޚަލީލެވެ. img:http://s3.psmnews.mv/images/660x400/14609749033820.jpg|ސިލްކްރޫޓްގެ ދަށުން "ބެލްޓް އެންޑް ރޯޑް" މީޑިއާ ކޯޕަރޭޝަން ޔޫނިއަންގެ ނަމުގައި ބްރޯޑްކާސްޓިންގ ޔޫނިއަނެއް އުފެއްދެވުން - ފޮޓޯ: ޕީއެސްއެމް ނިއުސް
ސިލްކްރޫޓްގައި ހިމެނޭ ހުރިހާ ޤައުމުތަކަކުންނާއި ބައިނަލްއަޤްވާމީ ގިނަ މީޑިއާތަކަކުން މިއަދު މި ޔޫނިއަން ގައި ބައިވެރިވެފައިވެއެވެ. "ބެލްޓް އެންޑް ރޯޑް" މީޑިއާ ކޯޕަރޭޝަން ޔޫނިއަން ޕްރޮޕޯސަލްގައި ރާއްޖޭގެ ޤައުމީ މީޑިއާގެ ފަރާތުން ސޮއިކުރެއްވީ ޕީއެސްއެމްގެ މެނޭޖިންގ ޑިރެކްޓަރ އިބްރާހީމް ޙަލީލެވެ. ޗައިނާގެ ވެރިރަށް ބެއިޖިންގްގައި މިއަދު ބޭއްވި މި ރަސްމިއްޔާތުގައި ރާއްޖެއިން ޗައިނާއަށް ކަނޑައަޅާފައިހުއްނަވާ ސަފީރު މުޙައްމަދު ފައިސަލް ވެސް ބައިވެރިވެވަޑަގެންނެވިއެވެ.