ހުޅުމާލެ ދެވަނަ ފިޔަވަހީގެ ވިނަރެސް ސަރަޙައްދު އަލިކުރުމުގެ މަސައްކަތް ދަނީ ކުރަމުން: ފަޒުލް
-
ފަޒުލް ވިދާޅުވީ ކަރަންޓު ވިއުގަ އަޅާފައިވަނިކޮށް ކޭބަލްތައް ގެއްލުނުކަމަށް
-
އަލުން ސާމާނު އޯޑަރުކޮށް މަސައްކަތް ފެށުމަށް ދަނީ ތައްޔާރުވަމުން
ހުޅުމާލޭގައި މިހާރު މީހުން އާބާދުވަމުންދާ ސަރަޙައްދުތަކުގެތެރެއިން، ވިނަރެސް ސަރަޙައްދުގައި މަގު ބައްތި ޖެހުމަށް ބޭނުންވާ ސާމާނު ހޯދާ އެމަސައްކަތް ފެށުމަށް ތައްޔާރުވަމުން އަންނަކަމަށް ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީން ވިދާޅުވެއްޖެއެވެ.
އަލަށް މީހުން އާބާދުވަމުންދާ ހުޅުމާލެ ދެވަނަ ފިޔަވަހީގެ ސަރަޙައްދުތަކުގައި، އާއްމުކޮށް މީހުން ބޭނުންކުރާ ބައެއް މަގުތައް އަނދިރިވުމުގެ ކަންބޮޑުވުން ދެވަނަ ފިޔަވަހީގައި ދިރިއުޅޭ ރައްޔިތުން ދަނީ ފާޅުކުރަމުންނެވެ. މިކަންބޮޑުވުންތަކާ ގުޅިގެން ހައުސިން ޑިވެލޮޕްމަންޓް ކޯޕަރޭޝަންގެ މެނޭޖިން ޑިރެކްޓަރ ފަޒުލް ރަޝީދު ވިދާޅުވީ ވިނަރެސް ފްލެޓްތައް ހިމެނޭ ސަރަޙައްދުގެ މަގު ބައްތިތައް ދިއްލުމަށް ބޭނުންވާ ކަރަންޓު ކޭބަލް ވިއުގަ އޮގަސްޓްމަހުގެ ތެރޭގައި ނިންމިކަމަށެވެ. އެ މަސައްކަތް ނިމިފައި ވަނިކޮށް، ވިއުގައިގަ އަޅާފައިވާ ކަރަންޓު ކޭބަލްތައް ގެއްލިފައިވާކަމަށް ފަޒުލް ވިދާޅުވިއެވެ.
ހުޅުމާލެ ދެވަނަ ފިޔަވަހީގައި ކަރަންޓު ކޭބަލް ވަގަށް ނެގުމުގެ ގިނަ މައްސަލަތަކެއް މީގެ ކުރިންވެސް ފެންމަތިވިއެވެ.
Hulhumale phase 2 ge vinares area ge magu bahthi thah dhihlumah beynun vaa thakethi hodhumah order kurevifai vey. Magu bahthi dhihlumah beynun vaa current viuga August 2024 ge niyalah nimifai vaairu, magu bahthi thakah alhaafai vaa cable thah gehllifai vaa vaahaka…
— Fazul Rashyd (@FaZuLRaShYd) October 9, 2024
ފަޒުލް ވިދާޅުވީ ވިނަރެސް ސަރަޙައްދުގެ މަގު ބައްތިތައް ދިއްލުމަށް، އެކަމަށް ބޭނުންވާ ތަކެތި އޯޑަރުކޮށް ހޯދުމުގެ މަސައްކަތް މިހާރު ކުރަމުންދާކަމަށެވެ. އެޗްޑީސީން މަސައްކަތް ކުރަމުންދަނީ ވީހާވެސް އަވަހަށް މަސައްކަތް ކުރިއަށް ގެންގޮސް، ރައްޔިތުންނަށް ދިމާވެފައިވާ މައްސަލަ ހައްލުކުރުމަށްކަމަށް އެކޯޕަރޭޝަނުން ވިދާޅުވެއެވެ.
ހުޅުމާލޭގެ ދެވަނަ ފިޔަވަހި އަލިކުރުމުގެ މަސައްކަތް ޚާއްސަ ޕްލޭނެއްގެދަށުން ދަނީ ކުރަމުންނެވެ. އެގޮތުން އެކި ހިސާބުތަކުގައި ކުރިއަށްގެންދާ މަޝްރޫޢުތައް ނިމި އެތަންތަނުގައި މީހުން އާބާދުވާންވާއިރަށް ބައްތި ޖެހުމުގެ މަސައްކަތް ކުރެއެވެ. އެޗްޑީސީން ވިދާޅުވީ ބައެއް ސަރަޙައްދުތަކުގައި ކޮންސްޓްރަކްޝަން މަސައްކަތްތައް ކުރިއަށްދާތީ އެހިސާބުތަކުގެ މަގުތަކުގައި ކަރަންޓު ވިއުގަ އެޅުމަށް ދަތިތަކެއް ދިމާވާކަމަށެވެ.