ޕީޖީގެ އަމުރަށް ބިންވެރިޔާ އަދި ގެދޮރުވެރިޔާ ސްކީމާގުޅޭ ޖިނާއީ ތަހުޤީގެއް އޭސީސީން ފަށައިފި

ބިންވެރިޔާ އަދި ގެދޮރުވެރިޔާ ސްކީމާގުޅޭ ޖިނާއީ ތަހުޤީގެއް ދިވެހި ފުލުހުންގެ ޚިދުމަތާއި ގުޅިގެން ފަށާފައިވާކަމަށް އެންޓި ކޮރަޕްޝަން ކޮމިޝަން، އޭސީސީން ވިދާޅުވެއްޖެއެވެ.

އޭސީސީން މިގޮތަށް ވިދާޅުވެފައިވަނީ ގޯއްޗާއި ފްލެޓް ދޫކުރުމުގައި އުސޫލުތަކާ ޚިލާފުވެފައިވާނަމަ ތަހުގީގުކޮށް، ދަޢުވާކުރަން ފޮނުވަން ޕްރޮސެކިއުޓަރ ޖެނެރަލް އަލްއުސްތާޛް ޢައްބާސް ޝަރީފް ދިވެހި ފުލުހުންގެ ޚިދުމަތާއި އެންޓި-ކޮރަޕްޝަން ކޮމިޝަން، އޭސީސީއަށް އަމުރުކުރައްވާފައިވަނިކޮށެވެ.

މިކަމާއި ގުޅިގެން އޭސީސީއިން ނެރުނު ބަޔާނެއްގައި ވިދާޅުވީ، ބިންވެރިޔާ އަދި ގެދޮރުވެރިޔާ ސްކީމާއި ގުޅޭ ޖިނާއީ ތަހުޤީގެއް ހިންގުމަށް ދިވެހި ފުލުހުންގެ ޚިދުމަތަށާއި އޭސީސީގެ މައްޗަށް ޕްރޮސެކިއުޓަރ ޖެނެރަލް ކުރެއްވި އަމުރާއި ގުޅިގެން ކޮމިޝަނުން ދިވެހި ފުލުހުންގެ ޚިދުމަތާއި މަޝްވަރާކޮށް، އަވަސް ތަހުޤީގެއް ކުރަމުންދާކަމަށެވެ.

ޕީޖީ އޮފީހުން ނެރުއްވި ބަޔާނެއްގައި ވިދާޅުވީ ސަރުކާރުން އިޢުލާންކޮށްފައިވާ "ބިންވެރިޔާ'' އަދި ''ގެދޮރުވެރިޔާ'' ސްކީމަށް އެދި ފޯމު ބަލައިގަތުމުގައާއި ގޯއްޗާއި، ފްލެޓް ލިބޭ ފަރާތްތައް ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި، ކަނޑައެޅިފައިވާ އުޞޫލުތަކާއި ގަވާއިދުތަކާ ޚިލާފަށް ޢަމަލުކޮށްފައިވުމުގެ ކަންބޮޑުވުން އެ އޮފީހުގެ ސަމާލުކަމަށް އައިސްފައިވާ ކަމަށެވެ. އަދި މިއީ ޢާންމު މަސްލަޙަތު މަތީ މިންވަރަކަށް އެކުލެވޭ ކަމަކަށްވާތީ ފުރިހަމަ ޖިނާއީ ތަޙުޤީޤެއް ހިންގަންޖެހޭ ކަމެއްކަމަށް ޕްރޮސެކިއުޓަރ ޖެނެރަލް ދެކެވަޑައިގަންނަވާ ކަމަށްވެސް ވިދާޅުވިއެވެ.