ޚާރިޖީ ވަޒީރުގެ ތަޢުޒިޔާގެ މެސެޖެއް ވަނުއާޓޫގެ ޚާރިޖީ ވަޒީރަށް

ވަނުއާޓޫއަށް އައި ބާރުގަދަ ބިން ހެލުމުގައި ބޮޑެތި ގެއްލުންތަކެއް ލިބި، ބަޔަކު މަރުވުމާއި ގުޅިގެން ޚާރިޖީ ވަޒީރު ޑރ. އަބްދުﷲ ޚަލީލް، ވަނުއާޓޫގެ ޚާރިޖީ ވަޒީރަށް ތައުޒިޔާގެ މެސެޖެއް ފޮނުއްވައިފިއެވެ.

އަންގާރަ ދުވަހު ވަނުއާޓޫއަށް އައި ބިންހެލުމަކީ ރެކްޓަރ މިންގަނޑުން 7.3 މެގްނިޓިއުޑްގެ ބާރުމިނުގައި އައި ބިންހެލުމެކެވެ.

ވަނުއާޓޫއަށް އައި ބިންހެލުމުގައި މަރުވި މީހުންގެ އަދަދު 14 އަށް އަރާފައިވާއިރު، އެކި ވަރުގެ އަނިޔާ ލިބުނު މީހުންގެ އަދަދު އުޅެނީ 200 އަށްވުރެ މަތީގައެވެ. އަދި ބިން ހެލުމާއި ގުޅިގެން އިމާރާތްތައް ވެއްޓި، އަސާސީ ޙިދުމަތްތަކަށްވެސް ވަނީ ބުރޫ އަރާފައެވެ.

ވަނުއާޓޫއަށް ކުރިމަތިވެފައިވާ ހިތާމަވެރި މި ދަނޑިވަޅާއި ގުޅިގެން ޚާރިޖީ ވަޒީރު ޑރ. އަބްދުﷲ ޚަލީލް ވަނީ އެ ޤައުމުގެ ޚާރިޖީ ވަޒީރަށް ތައުޒިޔާ ވިދާޅުވެ، މެސެޖެއް ފޮނުއްވާފައެވެ. ޚާރިޖީ ވަޒީރުގެ މެސެޖުގައި ދިވެހި ސަރުކާރާއި ދިވެހި ރައްޔިތުންގެ ނަމުގައި ވަނީ ތައުޒިޔާ ވިދާޅުވެފައެވެ. އަދި ވަނުއާޓޫއަކީވެސް ރާއްޖެފަދަ ޖަޒީރާ ޤައުމެއްކަން ފާހަގަކުރައްވައި، ޚާރިޖީ ވަޒީރު ވިދާޅުވީ މި ހިތާމަވެރި ދަނޑިވަޅުގައި ދިވެހި ރައްޔިތުން ތިބީ ވަނުއާޓޫގެ ރައްޔިތުންނާއެކުކަމަށެވެ. އަދި ބިންހެލުމުގައި މަރުވި މީހުންނާއި ގެއްލުން ލިބުނު މީހުންނަށް ވަޒީރުގެ މެސެޖުގައި ވަނީ ހަމްދަރުދީ ފާޅުކުރައްވާފައެވެ.

ޚާރިޖީ ވަޒީރުގެ ތައުޒިޔާގެ މެސެޖުގައި ބިން ހެލުމުން ލިބުނު ގެއްލުމުން އަރައިގަތުމަށް ކުރާ މަސައްކަތަށް ކާމިޔާބަށް އެދިވަޑައިގަންނަވާކަމަށްވެސް ވިދާޅުވެފައިވެއެެެވެ.