ކުޑަކުދިން ކުށްކޮށްގެން މިއަހަރުގެ ފުރަތަމަ 6 މަސްދުވަހު ޖުވެނައިލް ޖަސްޓިސް ޔުނިޓަށް ހުށައެޅުނު މައްސަލަތަކުގައި ހިމެނޭ 12 ކުއްޖަކު ރިހެބިލިޓޭޝަނަށްފަހު މުޖުތަމަޢަށް ނެރުއްވާފައިވާކަމަށް ހޯމް މިނިސްޓްރީން ހާމަކުރައްވައިފިއެވެ. މިއަހަރުގެ ފުރަތަމަ 6 މަސްދުވަހުގެ ތަފާސް ހިސާބު ހިމަނުއްވައިގެން ޖުވެނައިލް ޖަސްޓިސް ޔުނިޓުން ނެރުއްވާފައިވާ ރިޕޯޓްގައި ބަޔާންކުރައްވާފައިވާ ގޮތުން ޤާނޫނާ ޤަވާއިދާ ޚިލާފުވެގެން ޖުމްލަ 167 ކުއްޖެއްގެ މައްސަލަ މިއަހަރުގެ ފުރަތަމަ 6 މަސްދުވަހުގެ ތެރޭގައި އެޔުނިޓަށް ހުށައެޅިފައިވެއެވެ. މީގެތެރެއިން 120 ކުދިންނަކީ އަލަށް ކުށްކުރި ކުދިން، އަދި 47 ކުދިންނަކީ ކުށް ތަކުރާރު ކޮށްފައިވާ ކުދިންނެވެ. މީގެ ތެރެއިން ގިނައީ މަސްތުވާތަކެތި ބޭނުންކުރުމާއި، މާރާމާރީގެ މައްސަލަތައްކަމަށް ޖުވެނައިލް ޖަސްޓިސް ޔުނިޓުން ވިދާޅުވެއެވެ.
ޖުވެނައިލް ޖަސްޓިސް ޔުނިޓުން ވިދާޅުވާގޮތުގައި އެންމެ ގިނައިން ކުޑަކުދިން ކުށްތަކަށް އަރައިގަންނަނީ ޢުމުރުން 16 އަހަރާއި 18 އަހަރާ ދެމެދުގެ ޢުމުރުގައެވެ. އެޔުނިޓަށް ހުށައެޅިފައިވާ މައްސަލަތަކުގެ ތެރެއިން ގިނަ މައްސަލަތަކަކީ އެކި ސަބަބުތަކާ ހުރެ ސްކޫލުން ވަކިވެފައިވާ ކުދިންގެ މައްސަލަތަކެވެ. އެފަދަ ކުދިންގެ 75 މައްސަލަ މިއަހަރުގެ ފުރަތަމަ 6 މަސްދުވަހުގެ ތެރޭގައި ހުށައެޅިފައިވެއެވެ.
img:http://s1.psmnews.mv/images/660x400/14720408034550.jpg|ކުށްކުރާ ކުދިން އިސްލާޙުކުރުމަށް ދ. ވާނީގައި ހިންގަވާ ޕްރޮގްރާމް - ފޮޓޯ: ޕީއެސްއެމް ނިއުސް
ޢާއިލީ ޙާލަތުގެ ސަބަބުން ކުޑަކުދިން ކުށަށް އަރައިގަތުމުގެ ފުރުޞަތު ބޮޑުކަމަށާއި، ކުއްޖާގެ މަންމަ ނުވަތަ ބައްޕަ ކުށުގެ ވެށީގައި އުޅުމާއި މަސްތުވާތަކެތި ބޭނުންކުރުމަކީ ކުދިން ކުށުގެވެއްޓަށް ވަންނަ މައިގަނޑު އެއް ސަބަބުކަމަށް ޖުވެނައިލް ޖަސްޓިސް ޔުނިޓުން ވިދާޅުވެއެވެ. ކުށްކުރާ ގިނަ ކުދިންނަކީ ފުރާވަރުގެ ޢުމުރަށް އެޅުމުން މައިބަފައިންނަށް ކޮންޓްރޯލް ނުކުރެވޭ ކުދިންކަމަށާއި، އެފަދަ ކުދިންގެ މައްޗަށް ބަސްކިޔާ ފަރާތެއްކަމުގައި ގިނަފަހަރު ވެފައި އޮންނަނީ އެކުދިން ނިސްބަތްވާ ގްރޫޕްތައްކަމަށް ޖުވެނައިލް ޖަސްޓިސް ޔުނިޓްގެ ރިޕޯޓްގައިވެއެވެ.
އެޔުނިޓަށް ހުށައެޅިފައިވާ މައްސަލަތަކުގައި ހިމެނޭ ކުޑަކުދިންގެ ތެރެއިން ވަޒީފާ އަދާކުރަނީ މަދު އަދަދެއްގެ ކުދިން ކަމަށާއި، ގިނައީ އެއްވެސް ވަޒީފާއެއް އަދާނުކުރާ އަދި ކިޔަވަންވެސް ނުދާ ކުދިންކަމަށް އެޔުނިޓުން ވިދާޅުވެއެވެ. ޅައުމުރުގައި ކުށްތަކަށް އަރައިގަންނަ ކުދިންގެ ތެރެއިން ގިނައީ މާލޭ ސަރަޙައްދުގައި ދިރިއުޅޭ ކުދިންކަމަށްވެސް އެރިޕޯޓްގައިވެއެވެ.
ކުޑަކުދިން ކުށްތަކަށް އަރައިގަންނަ ސަބަބުތައްކަމުގައި ޖުވެނައިލް ޖަސްޓިސް ޔުނިޓުން ބަޔާންކުރައްވާ ސަބަބުތަކުގެ ތެރޭގައި ކުޑަކުދިންގެ ދީނީ އަޤީދާ ބަލިކަށިވުމާއި، ޢާއިލާ ރޫޅި މައިންބަފައިން އަރާރުންވުމާއި، ޢާއިލާގެ މެންބަރުން ކުށުގެ ވެށީގައި އުޅުމާއި، ޖިންސީ، ޖިސްމާނީ އަދި ނަފްސާނީ އަނިޔާގެ ޝިކާރައަކަށް ވުމާއި، ގޭންގް ކުށްކުރުމާއި މާރާމާރީ ހިންގާ ސަރަޙައްދެއްގައި ކުއްޖާ ދިރިއުޅުން ހިމެނެއެވެ.
img:http://s4.psmnews.mv/images/660x400/14720408154095.jpg|ކުށްކުރާ ކުދިން އިސްލާޙުކުރުމަށް ދ. ވާނީގައި ހިންގަވާ ޕްރޮގްރާމް - ފޮޓޯ: ޕީއެސްއެމް ނިއުސް
ޅައުމުރުގައި ކުށްތަކަށް އަރައިގަންނަ ކުދިންގެ އަދަދު މަދުކުރައްވައި، ކުށުގެ ވެށީގައި ޙަރަކާތްތެރިވާ ކުޑަކުދިން ތައުހީލުކުރުމަށްފަހު އަނބުރާ މުޖުތަމައަށް ނެރުމަކީ ސަރުކާރުގެ ސިޔާސަތެކެވެ. އެގޮތުން މިކަމަށް އާ ޕްރޮގްރާމްތައް ހޯމް މިނިސްޓްރީން ގެންދަވަނީ ތައާރަފްކުރައްވަމުންނެވެ. އެގޮތުން މިމަހުގެ ތެރޭގައި ވަނީ ދ. ވާނީގައި ހިންގެވި ރިހެބިލިޓޭޝަން ޕްރޮގްރާމަށްފަހު ބައިވެރިން މުޖުތަމައަށް ނެރުއްވާފައެވެ. މިއީވެސް ކުށުގެ ވެށީގައިއުޅޭ ކުޑަކުދިން ރިހެބިލިޓޭޓްކޮށް އަނބުރާ މުޖުތަމަޢަށް ނެރުއްވުމަށް ކުރައްވާ މައްސައްކަތްތަކުގެ ތެރެއިން ހިންގެވި ކާމިޔާބު ޕްރޮގްރާމެއްކަމަށް ހޯމް މިނިސްޓަރ ވަނީ ވިދާޅުވެފައެވެ.