ބިދޭސީއެއްގެ އަތުން 10,000 ރުފިޔާ ފޭރުނު މީހަކު ހައްޔަރުކޮށްފި
-
މި ހާދިސާ ހިނގާފައިވަނީ މި މަހު 26 ވަނަ ދުވަހުގެ ރޭގެ ވަގުތެއްގައި
-
މި ހާދިސާއާއި ގުޅިގެން 2 މީހަކުވަނީ ހައްޔަރުކޮށްފަ
-
1 ކަކުގެ ބަންދަށް 10 ދުވަސް ޖަހާފައިވޭ
ހުޅުމާލޭގައި ބައިސްކަލެއްގައި ދިޔަ ބިދޭސީއެއްގެ އަތުން 10,000 ރުފިޔާ އޮތް ވޮލެޓެއް ފޭރުނު މައްސަލައެއްގައި ތުހުމަތުކުރެވޭ މީހަކު ހައްޔަރުކޮށް، އޭނާގެ ބަންދަށް މުއްދަތު ޖަހައިފިއެވެ.
ފުލުހުން ވިދާޅުވީ މި ހާދިސާ ހިނގާފައިވަނީ މި މަހުގެ 26 ވަނަ ދުވަހުގެ ރޭގެ ވަގުތެއްގައެވެ. ހުޅުމާލެ ފޭސް 1 ގެ އެފްޑަބްލިޔު ރެސިޑެންސް ކައިރިން ބައިސްކަލެއްގައި ދިޔަ ބިދޭސީއެއްގެ އަތުން ވޮލެޓް ފޭރިގަތީ ސައިކަލެއްގައި ދިޔަ ދެ މީހެކެވެ. މި މައްސަލަ ފުލުހުންނަށް ރިޕޯޓްކޮށްފައިވަނީ އެ ރޭ 11:25 އެހައިކަންހާއިރުއެވެ.
މި މައްސަލަ ހުށަހެޅުމާއެކު، ހުޅުމާލެ ރެސްޕޮންސް އެންޑް ޕެޓްރޯލްއާއި އިންވެސްޓިގޭޝަން ގުޅިގެން ވަނީ ފޭރުނު މީހުން ހޯދުމުގެ މަސައްކަތް ފަށާފައެވެ. އެގޮތުން ސީސީޓީވީ ފުޓޭޖްތައް ބަލައި ފުލުހުން ކުރި މަސައްކަތުން، އެ މީހުން ދުއްވި ސައިކަލު އެ ރޭ 12:30 އެހައިކަންހާއިރު ވަނީ ހޯދާފައެވެ.
މި މައްސަލައިގެ ތުހުމަތުގައި ފުލުހުން ހައްޔަރުކޮށްފައިވަނީ ގދ. ވާދޫ، އަތަމާގެ، ޢިޖާޒު ނަޞީރު (40އ) އެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ އޭނާ 10 ދުވަހަށް ބަންދުކުރުމަށް އަމުރުކޮށްފައެވެ. މި ހާދިސާގައި ބައިވެރިވި ކަމަށް ތުހުމަތުކުރެވޭ ދެވަނަ މީހާ، ތަހުގީގުގެ ތެރެއިން ހޯދައި ޖުލައި 29 ވަނަ ދުވަހު ކޯޓު އަމުރެއްގެ ދަށުން ހައްޔަރުކުރި ނަމަވެސް، އޭނާ މިހާރު ވަނީ ފުލުހުންގެ ބަންދުން ދޫކޮށްލާފައެވެ.
ފުލުހުން ވިދާޅުވީ ބިދޭސީ މީހާގެ އަތުން ފޭރުނު 10,000 ރުފިޔާއާއި ވޮލެޓް މިހާރު ވަނީ ހޯދާފައެވެ. މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.