ބިލީ ޖީން ކިންގ ކަޕް ޗެކިއާ ކާމިޔާބު ކޮށްފި

ޗައިނާގެ ޝެންޒިންގައި ކުރިއަށްދިޔަ ބިލީ ޖީން ކިންގ ކަޕް ޓެނިސް މުބާރާތް ޗެކިއާއިން ކާމިޔާބު ކޮށްފިއެވެ.

ޗެކިއާއިން މިމުބާރާތް ކާމިޔާބު ކޮށްފައިވަނީ ފައިނަލްގައި ޔޫކްރެއިން އާއި ބައްދަލުކޮށް ކުރި ހޯދައިގެންެނެވެ. ތިން މެޗުގެ ތެރެއިން ގިނަ މެޗު ކާމިޔާބު ކުރާ ޓީމެއް މޮޅުވާގޮތަށް ކުޅުނު ފައިނަލްގައި ޗެކިއާއިން ކުރި ހޯދީ ކުޅެން އޮތް ތިން މެޗުގެ ތެރެއިން ފުރަތަމަ ދެމެޗު ކާމިޔާބު ކޮށްގެންނެވެ.

މިމުބާރާތުގައި މީގެކުރިން ޗެކިއާއިން ކުޅުނު އެހެން ބުރުތަކުގެ މެޗުތަކެކޭ އެއްގޮތަށް ފައިނަލްގައިވެސް ފެނިގެންދިޔައީ ކެރޮލީނާ މުޗޯވާ އާއި ލިންޑާ ނޮސްކޯވާގެ މޮޅުކުޅުމެވެ. މިއަހަރު ނޮސްކޯވާ އާއި މުޗޯވާ އަންނަނީ އަންހެން ޓެނިހުގައި މޮޅު ކުޅުމެއް ދައްކަމުންނެވެ. ފައިނަލްގައި ކުޅުނު ސިންގަލްސް ފުރަތަަމަ މެޗުގައި މުޗޯވާ ވަނީ ޔޫކްރެއިންގެ އަންހެލިނާ ކަލިނީނާ އާއި ބައްދަލުކުރި މެޗު ސީދާ ދެސެޓުން ކާމިޔާބު ކޮށްފައެވެ. މިމެޗުގެ ފުރަތަމަ ސެޓު މުޗޯވާ ހައެއް ދެއަކުން ކާމިޔާބު ކުރިއިރު ދެވަނަ ސެޓު އޭނާ ކާމިޔާބު ކޮށްފައިވަނީ ހައެއް ތިނަކުންނެވެ.

މިފައިނަލްގައި ކުޅުނު ދެވަނަ މެޗު ޗެކިއާގެ ނޮސްކޯވާ ކާމިޔާބު ކޮށްފައިވަނީ ޔޫކްރެއިންގެ އެލިނާ ސްވިޓޮލީނާ އާއި ބައްދަލުކޮށް ސީދާ ދެސެޓުން ކާމިޔާބު ކޮށްގެންނެވެ. މިގޮތުން ފުރަތަމަ ސެޓު ހައެއް ތިނަކުން ނޮސްކޯވާ ކާމިޔާބު ކުރިއިރު ދެވަނަ ސެޓު އޭނާ ކާމިޔާބު ކޮށްފައިވަނީ ޓައި ބްރޭކަކަށް ގޮސްގެންނެވެ. އެއީ ހަތެއް ފަހަކުން ޓައި ބްރޭކް ކާމިޔާބު ކޮށްގެންނެވެ.

މިއީ 2018 ވަނަ އަހަރަށް ފަހު ޗެކިއާއިން ބިލީ ޖީން ކިންގ ކަޕް ކާމިޔާބު ކުރި ފުރަތަމަ ފަހަރެވެ. އަދި މިއާއެކު މިމުބާރާތުގައި ދެވަނައަށް އެންމެ ކާމިޔާބު ޓީމަށްވެސް ޗެކިއާ މިވަނީ ވެގެން ގޮސްފައެވެ. މިކާމިޔާބީ އާއެކު ޗެކިއާއިން މިވަނީ 12 ފަހަރު މިމުބާރާތް ކާމިޔާބު ކޮށްފައެވެ. މިމުބާރާތުގެ އެންމެ ކާމިޔާބު ޓީމަކީ 18 ފަހަރު މިމުބާރާތް ކާމިޔާބު ކޮށްފައިވާ އެމެރިކާއެވެ. މިމުބާރާތުގެ ފައިނަލްގައި ޗެކިއާ އާއި ވާދަކުރި ޔޫކްރެއިންގެ ޓީމުން މަސައްކަތް ކުރަމުން ދިޔައީ މިމުބާރާތުގެ ތަށި ފުރަތަމަ ފަހަރަށް ކާމިޔާބު ކުރެވޭތޯއެވެ. ނަމަވެސް ޗެކިއާގެ ކައިރީގައި މާބޮޑު ވަރެއް ކުރެވޭގޮތެއް ނުވިއެވެ.