ކޯޓް ޢަމުރަކާ ނުލައި ޢާންމުތަންތަން ބަލައި ފާސްކުރުމުގެ ބާރު ޤާނޫނުތަންފީޛްކުރާ ހުރިހާ އިދާރާތަކަށް ލިބޭގޮތަށް ޖިނާއީ އިޖްރާޢަތުގެ ޤާނޫނަށް ސަރުކާރުގެ ފަރާތުން ހުށައެޅުއްވި އިޞްލާޙް އަނބުރާ ގެންދަވައިފިއެވެ.
ޖިނާއީ އިޖްރާއަތުގެ ޤާނޫނަށް އިޞްލާޙް ހުށައެޅުއްވީ ސަރުކާރުގެ ފަރާތުން ބިލެއްދޫ ދާއިރާގެ މެމްބަރު އަޙްމަދު މުބީނެވެ. މި ޤާނޫނަށް ވަނީ 99 އިސްލާޙެއް ހުށައެޅުއްވިއެވެ. އިޞްލާޙް ތަކުގެ ތެރޭގައި މައިގަނޑުގޮތެއްގައި ހިމެނެނީ، ޤާނޫނުގައި ހިމެނޭ ބައެއް ލަފްޒުތައް މާނަކުރާގޮތްތަކަށް ގެނައި ކުދި ބަދަލުތަކާއި، ޤާނޫނުގައި ހިމެނޭ ބައެއް މާއްދާތަކުގެ ތަރުތީބަށް ގެނައި ބައެއް ބަދަލުތަކުގެ އިތުރުން ޤާނޫނުގައި ކުރިން އައިސްފައިވާ ކަންކަމަށް މައިގަނޑުގޮތެއްގައި ބަދަލުތައް ނާންނާނެހެން ހުށައަޅާފައިވާ އިސްލާޙްތަކެވެ.
މި އިޞްލާޙްގައި ރޭޕްކުރުމާއި، ޓެކްސް ދެއްކުމުން އެއްކިބާވުމުގެ ކުށްކުށުގެ ތެރެއިން 500 ހާސް ރުފިޔާއިން ފެށިގެން މަތީގެ ފައިސާގެ ޢަދަދުތައް ހިމެނޭ މައްސަލަތަކަކީ ޖިނާއީ ބޮޑެތި ކުށްތައްކަމުގައި ވަނީ ހިމަނާފައެވެ. މީގެއިތުރުން ޖިނާއީ ކުށަކާ ގުޅިގެން ކޯޓް އަމުރަކާ ނުލައި ޢާންމުތަނަކަށް ވަނުމުގެ ބާރު ހަމައެކަނި ފުލުހުންނަށް ލިބޭގޮތަށް ޤާނޫނުގައި ކުރިން ބަޔާންކޮށްފައި އޮތް އޮތުން، އިތުރަށް ފުޅާކޮށް، އެބާރު ޤާނޫނު ތަންފީޛްކުރާ ހުރިހާ އިދާރާތަކަށް ލިބޭގޮތަށް މި އިޞްލާޙްގައި ބަޔާންކޮށްފައިވެއެވެ.
މީގެއިތުރުން ކުށެއްގެ ތުހުމަތުގައި މީހަކު ހައްޔަރުކުރާ ފުލުހުންގެ އޮފިސަރު ޔުނީފޯމުގައި ހުރުން ލާޒިކުރުރާގޮތަށް ޤާނޫނުގައި ކުރިން އޮތް އޮތުން ބަދަލުކޮށް، ފުލުހުންގެ އޮފިސަރު ހުރީ ޔުނީފޯމުގައި ނޫންނަމަ، ހައްޔަރުކުރެވޭ މީހާއަށް ފުލުސްމީހާގެ ތަޢާރަފެއް ދިނުމަށްފަހު، އޭނާއަކީ ފުލުހުންގެ އޮފިސަރެއްކަން އަންގައިދޭ ރަސްމީ ލިޔުމެއް ދެއްކުމަށްފަހު ހައްޔަރުކުރެވޭގޮތަށް މިޤާނޫނަށް އިޞްލާޙް ހުށައެޅިއެވެ.
އަދި މި އިޞްލާޙްތަކުގެ ބަހުސް މަރުހަލާ ނިންމައި، ވޯޓަށް އެހުމުގެ ކުރިން ސަރުކާރުން ވަނީ މި އިޞްލާޙް އަންބުރާ ގެންދަވާފައެވެ. ޖިނާއީ މައްސަލަތަކުގައި، ޤާނޫނުތަންފީޛްކުރާ އިދާރާތަކާއި، ޕްރޮސިކިއުޓަރ ޖެނެރަލްއާއި، ކޯޓްތަކާއި، ކަމާގުޅުންހުރި އެހެނިހެން އިދާރާތަކުން ޢަމަލުކުރަންޖެހޭ އިޖްރާޢަތްތައް ތަފްސީލުކޮށް ބަޔާންކުރާ، ޖިނާއީ އިޖްރާއަތުގެ ޤާނޫނަށް ޢަމަލުކުރަން ފަށާނީ ޖުލައިމަހުގެ 2 ވަނަ ދުވަހުން ފެށިގެންނެވެ. މިޤާނޫނަށް ޢަމަލުކުރަންފެށުމާއެކު، މީހެއްގެ މައްޗަށް ކުށެއްގެ ތުހުމަތުކުރެވޭ ހިސާބުންފެށިގެން، އޭނާގެމައްޗަށް އެމައްސަލައިގައި ކޯޓުން ޙުކުމް ކުރެވެންދެން ކަމާގުޅުންހުރި އިދާރާތަކުން ޢަމަލުކުރަންޖެހޭ އިޖްރާއަތްތައް ޤާނޫނަކުން ކަނޑައެޅިގެންދާނެއެވެ.