ދިއްގަރު ދާއިރާގެ މެމްބަރު އަޙްމަދު ފާރިސް މައުމޫންގެ ޝަރީޢަތް މަޑުޖައްސާލަންޖެހޭ ސަބަބެއް ނެތްކަމަށް ކްރިމިނަލް ކޯޓުން ކަނޑައަޅައިފިއެވެ.
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރުގެ އަޙްމަދު ފާރިސް މައުމޫންގެ މައްޗަށް ކޮށްފައިވާ ޝަޚްސު އޮޅުވާލުމުގެ ކުށުގެ ދައުވާގައި ފާރިސްގެ ފަރާތުން ހުށައަޅާފައިވަނީ، ޖިނާއީ އިޖްރާއަތުގެ ޤާނޫނުގެ ދަށުން އެކުލަވާލަންޖެހޭ ބައެއް ޤަވާއިދުތައް އެކުލަވާލާފައި ނުވާތީ، އެ ޤަވާއިދުތައް ސުޕްރީމް ކޯޓުން އެކުލަވާލަންދެން ޝަރީޢަތް މަޑުޖައްސާލުމަށެވެ. އެހެންނަމަވެސް މި ދައުވާގެ މިއަދުގެ އަޑުއެހުމުގައި ކޯޓުން ވަނީ އެޤަވާއިދުތައް އެކުލަވާލަންދެން ޝަރީޢަތް މަޑުޖައްސާލަންޖެހޭ ސަބަބެއް ނެތްކަމަށް ކަނޑައަޅާފައެވެ. އަދި ޤަވާއިދުތައް މިހާތަނަށް އެކުލަވާލެވިފައި ނުވިވަނަމަވެސް ޝަރީޢަތް ހިންގުމަށް ހުރަހެއް ނެތްކަމަށް މައްސަލަ ބައްލަވާ ޤާޟީ ވިދާޅުވިއެވެ.
ފާރިސްގެ މައްޗަށް ޝަޚްސު އޮޅުވާލުމުގެ ދައުވާކޮށްފައިވަނީ ޕީޕީއެމުން ވަކިކުރިފަހުން އެޕާޓީގެ ދިދައާއި ލޯގޯ ބޭނުންކޮށްފައިވާ މައްސަލައިގައެވެ. މިމައްސަލައާ ގުޅިގެން ފާރިސްގެ ވަކީލުން ކޯޓުގައި ބުނެފައިވަނީ އެޕާޓީގެ ދިދައާއި ލޯގޯ އޭނާ ބޭނުންކޮށްފައިވަނީ އެޕާޓީގެ ރައީސް ކަމުގައި މައުމޫން ޢަބްދުލްޤައްޔޫމް ހުންނެވިއިރު އެމަނިކުފާނުގެ ހުއްދައާއެކުގައިކަމަށެވެ. އެހެންނަމަވެސް ދައުލަތުގެ ވަކީލް ވިދާޅުވީ ސިވިލް ކޯޓުން އޭރު ޕާޓީ ހިންގުން އެޕާޓީގެ މުސްތަޝާރު ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާ ޙަވާލުކޮށްފައިވާކަމަށެވެ.
އަޙްމަދު ފާރިސް މައުމޫން ހުންނެވީ ރައްޔިތުންގެ މަޖިލީހުގެ މެމްބަރުންނަށް ރިޝްވަތު ހުށައެޅި ކަމަށް ކުރެވޭ ތުހުމަތަކާ ގުޅިގެން ކޯޓް އަމުގެ ދަށުން ޝަރީޢަތް ނިމެންދެން ޖަލުގައި ބަންދުކޮށްފައެވެ. އޭނާގެ ބަންދުގެ މައްސަލައިގެ އިސްތިއުނާފް އަޑުއެހުންތައް ހައިކޯޓުގައި ވަނީ ނިންމާލާފައެވެ. އަދި މިއަދު އެމައްސަލަ ނިންމުމަށް ބާއްވަން އުޅުނު އަޑުއެހުން ވަނީ ކެންސަލްކޮށްފައެވެ.