ޖުޑީޝަލް ސަރވިސް ކޮމިޝަނުން ބަލަމުންދާ މައްސަލައަކާ ގުޅިގެން ކްރިމިނަލް ކޯޓުގެ ޤާޟީ އަލްއުސްތާޛް އަޙްމަދު ރަޝީދު ވަގުތީގޮތުން ފަނޑިޔާރުކަމުގެ މަސްޢޫލިއްޔަތުތަކާ ވާޒިބުތަކުން އެކަހެރިކޮށްފިއެވެ.
ޖުޑީޝަލް ސަރވިސް ކޮމިޝަނުން ބުނީ ކްރިމިނަލް ކޯޓްގެ ޤާޟީ އަޙްމަދު ރަޝީދާ ބެހޭގޮތުން، އެކޮމިޝަނަށް ހުށައެޅުނު މައްސަލައެއް ބަލަމުންދާތީ އެމައްސަލަ ބަލައި ނިމެންދެން ޤާޟީ އަޙްމަދު ރަޝީދު ފަނޑިޔާރުކަމުގެ މަސްޢޫލިއްޔަތުތަކާއި ވާޖިބުތަކުން އެކަހެރިކުރުމަށް ނިންމާފައިވާކަމަށެވެ. އަދި މިގޮތަށް އެކޮމިޝަނުން ނިންމާފައިވަނީ މި މައްސަލައާ ގުޅިގެން އެކޮމިޝަނުން ހެކިބަސް ނަގާފައިވަނީ ކްރިމިނަލް ކޯޓްގެ ބައެއް ޤާޟީންނާއި މުވައްޒަފުންގެ ހެކި ބަހުން، ޤާޟީ އަޙްމަދު ރަޝީދު ކްރިމިނަލް ކޯޓްގެ ވަޒީފާއަށް ނުކުމެއްޖެނަމަ ހެއްކަށް ނުފޫޒު ފޯރުވުމުގެ ފުރުޞަތު އޮތުމާއި، މިކަމުގެ ސަބަބުން ތަޙްޤީޤަށް ހުރަސްއެޅިދާނެތީކަމަށް ޖޭ.އެސް.ސީން މައުލޫމާތުދެއެވެ.
ފަނޑިޔާރުންނާ ގުޅިގެން ހުށައެޅޭ ސުލޫކީ މައްސަލަތަކާއި، އެހެނިހެން މައްސަލަތަކާ ގުޅިގެން ފިޔަވަޅު އެޅުމުގެ ބާރު، ދިވެހިރާއްޖޭގެ ސުޕްރީމް ކޯޓްގެ އިތުރުން ލިބިފައިވަނީ ޖުޑީޝަލް ސަރވިސް ކޮމިޝަނަށެވެ.