ރަޙްމަތްތެރިކަމުގެ ދަތުރެއްގައި ޗައިނާ ސިފައިންގެ 3 މަނަވަރު ރާއްޖެ އަތުވެއްޖެއެވެ.
މިއަދު ހެނދުނު ރާއްޖެ އައި ތިން މަނަވަރަކީ، ޗައިނީސް ނޭވީގެ ޗޭން ޗަން އާއި، ޖިންގް ޒޫ އަދި ޗައޮ ހޫއެވެ. މި ތިން މަނަވަރު ރާއްޖެ އައުމާ ގުޅިގެން ދިވެހި ސިފައިންގެ އިސް އޮފިސަރުންނާއި ސިފައިން ވަނީ މަނަވަރުތަކުގެ ފަޅުވެރިންނަށް މަރުހަބާއެއް ކިޔާފައެވެ. ޗައިނާ މަނަވަރުތަކުގެ ސެއިލަރުންނަށް މަރުޙަބާ ކިޔުމުގެ ގޮތުން އެމްޕީއެލް ސަރަޙައްދުގައި ވަނީ ޚާއްޞަ ރަސްމިއްޔާތެއް ބާއްވާފައެވެ.
މި ދަތުރުގައި މި ތިން މަނަވަރުގެ ސެއިލަރުންނާ ގުޅިގެން ދިވެހި ސިފައިން ތަމްރީނު ހަރަކާތްތަކެއް ހިންގުމަށް ހަމަޖެހިފައިވާއިރު، އެކުވެރިކަން ބަދަހި ކުރުމުގެ ގޮތުން ބައެއް ކުޅިވަރު ހަރަކާތްތައް ވެސް ބޭއްވުމަށް ހަމަޖެހިފައިވާކަމަށް އެމް.އެން.ޑީ.އެފުން މައުލޫމާތުދެއެވެ. އަދި ސިފައިންގެ ގިރިފުށީ ޓްރޭނިންގ ސެންޓަރަށާއި، އަތޮޅުތެރޭގައި ޤާއިމުކޮށްފައިވާ ސިފައިންގެ މަރުކަޒުތަކަށް މިމަނަވަރުތައް ދަތުރުކުރުމަށް ހަމަޖެހިފައިވާކަމަށް އެމް.އެން.ޑީ.އެފުން މައުލޫމާތުދެއެވެ.
މި ތިން މަނަވަރު ރާއްޖެއިން ފުރުމަށް ހަމަޖެހިފައި ވަނީ މިމަހުގެ 31 ވަނަ ދުވަހުއެވެ.