އީރާނުގެ ނިއުކްލިޔަރ ޕްރޮގްރާމުގެ މައްސަލައިގައި 2015 ވަނަ އަހަރު، އެ ގައުމާއި ދުނިޔޭގެ ބާރުތަކާ ދެމެދު ޤާއިމުކުރި އެއްބަސްވުމުން ވަކިވުމުގެ ވިސްނުމެއް އެމެރިކާގެ ސަރުކާރުން އަދި ނުގެންގުޅޭކަމަށް އެމެރިކާގެ އިސް އޮފިޝަލުން ހާމަކުރައްވައިފިއެވެ.
އެމެރިކާގެ ސަރުކާރުގެ އިސް އޮފިޝަލުން މިކަން ހާމަކުރައްވާފައި މިވަނީ މި އެއްބަސްވުމަށް އީރާނުން ކިޔަމަންވަމުންދާކަން ކަށަވަރުކުރުމަށް އެމެރިކާގެ ސަރުކާރުން ދެކޮޅު ހަދާކަން އެ ގައުމުގެ ރައީސް ޑޮނަލްޑް ޓްރަމްޕް ހާމަކުރައްވާފައިވާ ދަނޑިވަޅެއްގައެވެ. 2015 ވަނަ އަހަރުގެ ތާރީޚީ އެއްބަސްވުމުން އެމެރިކާ ވަކިވާނެކަމުގެ ބިރު ހީވެފައިވާ މި ދަނޑިވަޅުގައި، އެމެރިކާއިން މި އެއްބަސްވުމުގައި ދެމި ހުންނާނެކަމަށް، އެން.ބީ.ސީގެ ޕްރޮގްރާމް 'މީޓް ދަ ޕްރެސް'ގައި ވާހަކަދައްކަވަމުން އެމެރިކާއިން އދށް ކަނޑައަޅުއްވާފައި ހުންނަވާ ސަފީރު ނިކީ ހޭލީ ވިދާޅުވިއެވެ.
އަދި އީރާނުން މި އެއްބަސްވުމާ ޚިލާފުވަމުންދާކަމަށް އެމެރިކާއިން ތުހުމަތު ނުކުރާކަމަށާއި، އެމެރިކާގެ ކަންބޮޑުވުމަކީ، އެއްބަސްވުމުން ބޭރު ބައެއް ދާއިރާތަކުގައި، އީރާނުގެ ސަރުކާރުން ކަންބޮޑުވާ ފަދަ ޢަމަލުތަކެއް ހިންގަމުންދިޔުންކަމަށް ހޭލީ ވިދާޅުވިއެވެ.
އީރާނުގެ ނިއުކްލިޔަރ އެއްބަސްވުމާ އެ ގައުމު ޚިލާފުވަމުންދާކަމަށް މިހާތަނަށް ބުނެފައިވަނީ ހަމައެކަނި އެމެރިކާއިންނެވެ. ދުނިޔޭގެ އަނެއް ފަސް ބާރު ކަމަށްވާ އިނގިރޭސިވިލާތް، ފަރަންސޭސިވިލާތް، ޖަރުމަނުވިލާތް، ރަޝިޔާ އަދި ޗައިނާއިން މިކަމާމެދު ކަންބޮޑުވުން ފާޅުކޮށްފައެއް ނުވެއެވެ.