އިނގިރޭސިވިލާތަށް އެހެން ޤައުމުތަކުން އެތެރެވާ ހުރިހާ މީހުން 14 ދުވަހަށް ކަރަންޓީންކުރުމަށް ނިންމާ، އެކަން ވަރަށް އަވަހަށް ފެށުމަށް ހަމަޖެހިފައިވާކަމަށް ބައެއް އެއަރލައިންތަކުން ބުނެފިއެވެ.
އިނގިރޭސިވިލާތުގެ ބައެއް އެއަރލައިންތަކުން ބުނީ އަޔަރލެންޑް ފިޔަވައި އެހެން ހުރިހާ ޤައުމަކުން އަންނަ ހުރިހާ މީހުން 14 ދުވަހަށް ކަރަންޓީންކުރުމަށް ނިންމާފައިވާކަމަށް ސަރުކާރުގެ އޮފިޝަލުން ބުނެފައިވާކަމަށެވެ. ޚަބަރުތައް ބުނާގޮތުން މިގޮތަށް މީހުން ކަރަންޓީންކުރަން ފަށާނީ މިމަހުގެ ފަހުކޮޅުއެވެ. އަދި މިއީ އަނެއްކާވެސް ކޯވިޑް ހަލުވިކަމާއެކު ފެތުރުން ކޮންޓްރޯލްކުރުމަށް އަޅާ ފިޔަވަޅެއްކަމަށްވެސް ޚަބަރުތައް ބުނެއެވެ.
އިނގިރޭސިވިލާތުގެ ސަރުކާތުން މިކަމާބެހޭ ގޮތުން ރަސްމީކޮށް މިހާތަނަށް ވާހަކަދައްކާފައެއް ނުވެއެވެ. ނަމަވެސް މަޢުލޫމާތު އެނގޭ ފަރާތްތަކުން ބުނަނީ ކަރަންޓީންކުރަން ހަމަޖެހިފައިވަނީ އަމިއްލަ ގޭގައިކަމަށެވެ. އަދި މިގޮތަށް ކަރަންޓީންކުރުން ކުރިއަށްދާނީ ކިހާ ދުވަހަކަށްކަމެއް ނޭނގޭކަމަށްވެސް ބައެއް އޮފިޝަލުންނާ ޙަވާލާދީ ޚަބަރުތައް ބުނެއެވެ.
ބައެއް އެއަރލައިންތަކުން ބުނީ ސަރުކާރުން މިހާތަނަށް މާބޮޑު ތަފްސީލެއް ނުދޭކަމަށެވެ. އަދި ކަރަންޓީންކުރާނީ ހަމައެކަނި ވައިގެ މަގުން އަންނަ ފަސިންޖަރުންތޯވެސް ބައެއް ފަރާތްތަކުން ސުވާލުކުރެއެވެ.
ޚަބަރުތައް ބުނާގޮތުން ކަރަންޓީންކުރުމާ ގުޅޭ ތަފްސީލްތައް ކަމާބެހޭ ފަރާތްތަކުން ވަރަށް އަވަހަށް ހާމަކުރާނެއެވެ.
އެއަރޕޯޓްތައް ހިންގާ ކުންފުނިތަކުން ބުނާގޮތުން ކަރަންޓީންކުރުމުގެ ހަމައެކަނި ގެއްލުން ވާނީ އޭވިއޭޝަން އިންޑަސްޓްރީއަށް ނޫންކަމަށާއި، މުޅި އިޤްތިޞާދަށް އެކަމުގެ އަސަރުކުރާނެކަމަށެވެ. އެހެންކަމުން މިފަދަ ފިޔަވަޅުތައް އަޅަންޖެހޭނީ ވަރަށް ރަނގަޅަށް ބެލުމަށްފަހުކަމަށް ތަޖުރިބާކާރުން ބުނެއެވެ.
އިނގިރޭސިވިލާތުގައި މިހާތަނަށް ދެ ލައްކައަށްވުރެ ގިނަ މީހުން ކޯވިޑް ޖެހިފައިވާއިރު، ތިރީސް ހާހަށްވުރެ ގިނަ މީހުން ވަނީ މަރުވެފައެވެ.