ކޯވިޑް19 ފެސިލިޓީއެއްގެ ގޮތުގައި އޮތްއޮތުން ނިމުމަކަށް ގެނެސް، އަންނަމަހުގެ 1 ވަނަ ދުވަހުން ފެށިގެން ޓްރީޓޮޕް ހޮސްޕިޓަލް ޢާއްމު ޚިދުމަތްތަކަށް ހުޅުވާލުމަށް ނިންމައިފިއެވެ.
ޓްރީޓޮޕް ހޮސްޕިޓަލުން އަލުން ޚިދުމަތްދޭން ފެށުމަށް ނިންމާފައިވާއިރު، މިދިޔަ މޭމަހުގެ 1 ވަނަ ދުވަހުން ފެށިގެން ޓްރީޓޮޕް ހޮސްޕިޓަލް ބޭނުންކުރަމުންދަނީ ކޯވިޑްއަށް ފަރުވާދިނުމަށް ޚާއްސަ ހޮސްޕިޓަލެއްގެ ގޮތުގައެވެ.
ޓްރީޓޮޕް ހޮސްޕިޓަލުން ބުނީ ބުދަދުވަހުން ފެށިގެން ކުރިންވެސް އާއްމުންނަށް ދެމުންދިޔަ ހުރިހާ ޚިދުމަތެއް އެހޮސްޕިޓަލުން ލިބޭނެކަމަށެވެ. އަދި ހޮސްޕިޓަލުން އަލުން ޚިދުމަތްދޭން ފެށުމުގެ ކުރިން އަޅަންޖެހޭ ހުރިހާ ފިޔަވަޅުތަކެއް އަޅާ ހޮސްޕިޓަލް އެއްކޮށް ޑިސްއިންފެކްޓްކޮށްފައިވާކަމަށް ޓްރީޓޮޕް ހޮސްޕިޓަލުން ބުނެއެވެ. އަދި ހޮސްޕިޓަލަށް ޒިޔާރަތްކުރާ ފަރާތްތަކުންވެސް ރައްކާތެރިކަމަށްޓަކައި އަމަލުކުރަންޖެހޭ އުސޫލުތަކެއްވެސް ހުންނާނެކަމަށް އެހޮސްޕިޓަލުން މަޢުލޫމާތުދެއެވެ.
ޓްރީޓޮޕް ހޮސްޕިޓަލް ކޯވިޑް ޖެހިފައިވާ މީހުންނަށް ޚާއްސަ ހޮސްޕިޓަލަކަށް މޭމަހުގެ 1 ވަނަ ދުވަހުން ފެށިގެން ބަދަލުކޮށްފައިވާއިރު، އެ ހޮސްޕިޓަލުން އިތުރު ޚިދުމަތެއް ނުދެއެވެ. ނަމަވެސް ޓްރީޓޮޕް ހޮސްޕިޓަލްގެ އިމަންޖެންސީ ކްލިނިކެއް ވަނީ ހުޅުމާލެ ހޮސްޕިޓަލްގައި ޤާއިމްކޮށްފައެވެ.
ސަރުކާރާއި ޓްރީޓޮޕް ހޮސްޕިޓަލާ ދެމެދު ވެފައިވާ އެއްބަސްވުމުގެ ދަށުން ކޯވިޑް ޖެހިފައިވާ މީހުންނަށް ފަރުވާ ދިނުމަށް ޓްރީޓޮޕް ހޮސްޕިޓަލުން އެއްވެސް އަގެއް ނުނަގައެވެ. އަދި ސަރުކާރުން ކޯވިޑް ޓްރީޓްމަންޓް ފެސިލިޓީއެއްގެ ގޮތުގައި ބޭނުންކުރުމަށްވެސް ޓްރީޓޮޕް ހޮސްޕިޓަލުން އަގެއް ނުނަގައެވެ.