އިންޑިއާގެ ވަކި ހިސާބަކުން ނޫނީ ނުލިބޭ ލަކުޑިއެއް ވަގަށް ވިއްކުމުގެ ވިޔަފާރިކުރާ ބަޔަކު އެކަން ފުލުހުންނަށް ވަގަށް ކުރާ ގޮތް ދައްކުވައިދޭ ފިލްމު "ޕުޝްޕާ" ގެ ސީކުއަލްގެ މަސައްކަތް ފަށައިފިއެވެ.
މިދިޔަ އަހަރު ބޮކްސް އޮފީހުގައި ބޮޑު ކާމިޔާބެއް ހޯދާފައިވާ "ޕުޝްޕާ" ދެވަނަ ބައިގެ ސްކްރިޕްޓްވެސް މިހާރު ވަނީ ލިޔަން ފަށާފައެވެ. އަދި ކުރިއަށް އޮތް ދެތިންމަސްދުވަހުގެ ތެރޭގައި ފިލްމުގެ މަސައްކަތް ފަށާނެކަމަށްވެސް ޕްރޮޑަކްޝަން ޓީމުން ބުނެއެވެ.
ތެލުގޫ ތަރި އައްލޫ އަރުޖުން އާއި ރަޝްމިކާ މަންޑަން ލީޑްރޯލުން ފެންނަ މި ފިލްމުގައި އައްލޫ "ޕުޝްޕަރާޖް" ގެ ރޯލު ކުޅޭއިރު ރަޝްމިކާ ފެންނަނީ ސްރިވައްލީގެ ރޯލުންނެވެ.
"ޕުޝްޕާ" ގެ އެންމެ މަޝްހޫރުވި އެއްލަވަ
މި ފިލްމަކީ މިދިޔަ އަހަރުގެ އެންމެ ބޮޑު ހިޓެކެވެ. މި ފިލްމަށް ފައިދާގެ ގޮތުގައި މިހާތަނަށް 229 ކްރޯޑް ރުޕީސް ވަނީ ލިބިފައެވެ.
ސުކުމޫރު ޑައިރެކްޓުކޮށްފައިވާ މި ފިލްމު ރަޝްމިކާ އާއި އައްލޫގެ އިތުރުން ފަހްދު ފާސިލްވެސް ލީޑްރޯލުން ފެނެއެވެ.
މިދިޔަ އަހަރު ޑިސެމްބަރު 17 ވަނަދުވަހު ރިލީސްކުރި މި ފިލްމަށް ވުރެ ބޮޑަށް ފިލްމުގެ ލަވަތައްވަނީ ހިޓްވެފައެވެ. ފިލްމި ރިލީޒްވުމާއި އެކު ފިލްމުގެ ލަވަތައް ސޯޝަލް މީޑިއާގެ އެކު ޕްލެޓް ފޯމްތަކުން އަދިވެސް އަންނަނީ ފެންނަމުންނެވެ. ހާއްސަކޮށް ފިލްމުގައި ހިމެނުނު "ސްރިވައްލީ" ލަވައިގެ ހިމެނޭ އަރުޖުންގެ ޑާންސް ސްޓެޕެއް ސޯޝަލް މީޑިއާގައި ވައިރަލްވެ އެ ސްޓެޕް ބޭނުންކޮށްގެން އެތައް ބަޔަކު ޓީކްޓޮކާއި އިންސްޓަގްރާމް އަދި ފޭސްބުކް ފަދަ އެޕްތަކަށް ވީޑިއޯތައް ހަދާފައެވެ.